..بسم الله الرحمن الرحيم..
السلام عليكم جميعاً
حياالله من لفانا من بناتن حلوات وحريم عاقلات
اليوم جايتكم بكل رقة وأدب أبعلمكم الاتكيت يامال العافية
*******************
حنا بنات يزينا الخلق الرفيع والتصرفات الصحيحة اللي تجي في مكانها الصحيح ووقتها المناسب
واللي دعاني لكتابة هالموضوع فيه هو ملاحظتي لبعض التصرفات الغيرلائقة من البنات وأكيد أكثرها اتكون عفوية
أوبدون تفكير أوتركيز..بس في الأخير تسيء لشكل البنت وشخصيتها وتعطي انطباع موحلو عن البنت..
وطبعاً نعرف إن الإتكيت علم قائم بحد ذاته ويعطى فيه دروس في كثير من دول العالم
وحنا نولد مانعرف شي بس نتعلم من المشاهدة والقراءة والانطباع والاحتكاك بالغير واكتساب الخبرات
ودائما يوجد هناك ماينقصنا لنتعلمه
لذا حبيت ادون بعض ملاحظاتي وارشادات نابعة من قلب محب لتزويدنا نحن الكائنات اللطيفة بمايزيد من حسن تصرفنا
وردات فعلنا ومايجب أن نكون عليه كسيدات مجتمع..
مووووب عارفة بأي لغة تكتب هي فصحى هي عامية..بس أهم شي الأخلاق والإتكيت..
1-العلك..
أسوأ منظر ممكن تشوف عليه البنت وهي تعلك العلكة
جغ جغ جغ...
يعني الملامح تتعفج..والأنوثة تروح في خبركان ..والأمطار "تطشر" مع كل كلمة فياعزيزتي
..تجنبي العلكة في أي مكان عام تتواجدين فيه وطبعا ماهي ممنوعة بس في البيت مع صديقتي الكلوز..
بس مع الناس وفي المناسبات الاجتماعية..بليييييز لاتعلكين تراه ينافي اتكيت المرأة الراقية
وخاصة في الزواجات ..تجيك البنت ضاربة بعمرها الشيطان الرجيم من الكشخة والمكياج ورزة العمر
بس للأسف قاعدة تعلك بضراوة..تقولين بينها وبين العلك ثأر قديم..واللي يزيد الطين بلة إذاجت ترقص مدري كيف توازن بين عملية
العلك وبين هز ياوز قمة البشاعة مهماكانت متشيكة..تروح الشخصية في خبركان والسبب العلك أبونص ريال يعني كشخة مكلفة كم ألف يطيرهاعلك أبو نص..!!
2-الصوت العالي وسرعة الكلام..
الصوت العالي أسوأصفة تتصف بها البنت لأن الصوت العالي من سمات الرجال أما البنت
لازم صوتها يكون منخفض وكلامها مرتب وحكيها مترابط وبدون عجلة على ايش الصراخ والسرعة في الكلام؟!!
ماأنت ملحوقة بعصا خاصة إن السرعة في الكلام من أهم أسباب حدوث الأمطار في وجه كل من يقابلك..
ولوكانت هاذي طبيعة فيك فالتمرين هو أحسن طريقة لك تدربي على ضبط التووون حق صوتك
وحاولي كلما فلت منك الزمام انك تتمالكين نفسك مرة ثانية وتتكلمين بصوت رآآيق وبدون سرعة في الكلام لأن البنتتزداد جمالاً وجاذبية بالصوت المنخفض والكلام الرايق فلا تلومين الناس ان شفتيهم يكرهون التعاطي بالكلام معك أوحتىتشوفينهم يضحكون عليك أويعلقون على طريقتك..لانه افعلا غلط..
3- "بكم شريتي هذا؟!!"
كثيرمن الجنس اللطيف يحبون اللقافة..وأسوأ أنوااع اللقافة..سؤال بطلت موضته وصار أولد فاشن ..اللي هو
بكم شريتي هذا؟!
اكثرشي مماينفر الناس منك ويعطي انطباع انك مشفوحة لماتشوفين شيء عاجبك
وتسألين صاحبته بكم شريتيه؟
طبعاً حلو ومن أصول الاتكيت انك تثنين على شيء عاجبك أمام صاحبته مع ذكرالله..بس حذار من السؤال الشعبي بكم أخذتيه؟؟
4-احتضان الجوال..
أول ماطلع الجوال وبعده بكم سنةكانوا الناس يمشون وفي يديهم الجوال مدري يمكن يخافون ينحاش منهم لدرجةانهم
يمكن ينامون وهم حاضنينه وكانت النساء بكل أحجامهن في المناسبات والاعراس تمشي وهوفي يدها
من زود التشخيص كثير مايقومون ولايقعدون إلا بالجوال!!
وكانوا بعد يرقصون وهم ماسكينه ترى هالحركة قديمة للأسف وتثيرالسخرية منك فتخلي عن هالحركة واتركي جوالك المحروس في الشنطة واللي يلزم ان الجوال يكون بيدها على طول ممكن
اخت العروسة أواخت العريس أوأم العروس أوالعريس...
فانتبهي عزيزتي لهاالنقطة بلييييز..
5- كثرة تحريك اليدين أثناءالكلام وهزالأرجل..
بعد لوكنت من اللي يعبرون بايديهم عندالكلام حاولي التخفيف من هالعادة
لانها تنافي أصول التصرف السليم الأفضل الكلام والايدي تكون قدرالامكان ماتتحرك إلابشكل بسيط
وبنعومة موكأنها مساحات سيارة الله يصلحك
وثقي أن كلامك معبر وواصل بدون مساعدة مؤثرات طبيعيةأخرى..
وبعدانتبهي من عادة هزالرجل إذاكنت جالسة مع الناس لانه يعطي انطباع انك قلقة وبعد
تصرف غيرلائق أمام الضيوف أوالمدعوين.
6- معركةالبوفية
في المناسبات والأعراس أول ماتفتح أبواب صالات الطعام تنطلق أفواج الجنس اللطيف هاجمة على البوفيه
ويبدأن في اختطاف الاطباق و"تماعط" الصحون والصف سرا كنهم عند خباز..وهات ياغرف جائر
واقوله لاني أشهدهالشيء وبدون مبالغة في كل مناسبة تقريباً البنت تجيك في الزواج كاشخة وثقل ومكياج وتسريحة
وفستان روعة لكن عند فتح باب صالة الطعام يوووووووووووو
تنكشف الأقنعة وتروح هالشخصية
وتشوفها تراكض ناصية البوفية..ونآتفة الصحن وقابضة سرا
وفيه منهم من هي تتصرف بذهانة وتمسك صحنين مع بعض وهات ياغرف من كل صحن تمر جنبه
اول شي ترص من هالمقبلات ثم الرزوالمكرونة والمحشيات والايدامات ثم ترص من الاكل الشعبي ثمن عاد
تحط كونر"صغنطوط "للحلا..أومحلا أوكيك..
ماهي مبالغة..شوفة عيني..
وبعدين تروح تجلس جلسةا لمنتصربعد إنتهاء مهمتها بنجاح واستغرب كيف تاكل هالخبصة هاذي كل شي داخل على بعض
وتلاقي الصحن اللهم ياكافي صايرهرم من رص الأكل فوق بعضه"ماشاء الله"
وتبدأتاكل لقمة لقمتين ثمن تقوم وتترك الصحن ممتلئ وحوسة عقبها!!
يعني بالله كيف بتاكل والصحن على هالهيئةالمقرفة..الله يكرم النعمة ويديمها
يعني اسأتي للنعمة وأسأتي لنفسك وعبرتي أسوأ تعبير عن شخصيتك بهالتصرف
الغيرلائق بالمرة
أولا البوفيه مايكون بمسك السرا وانما لازم من وجود فراغات بين المدعوات عشان كل وحدة تتصرف وتغرف
بحرية وبعدين تكون البداية بغرف السلطات والمقبلات أوالشوربة وسكب كمية قليلة تناسب نظام اكلك بعدها اجلسي على الطاولة
وأبدأي بلع يآمآل اللي مانب قايلة..
ثمن خوذي لك صحن نظيف وحطي لك إذا خاطرك بأكلة أونوع معين كل شي على حدة مو كل أبوو الدنيا ومن جابها
بصحن واحد..والله فشلة!!
وبس إذا خلصتي ..احمدي ربك واشكري أهل الدعوة
...........
وفي النهايه ..
عزيزتي أحب أذكرك ان تصرفك اللائق يكمل جوانب شخصيتك..ويزيدك جمال..ويكسبك مهابة واحترام وإعجاب..
عشان كذا لاتترددين في التخلي عن العادات الغلط.
طبعاً في اصول كثيرة ماجبنا طاريها مثل آداب الأكل والمائدة وأصول اسقبال الضيوف وتضييفهم
اشياء كثيرة من الافضل اناحنا نتعلمها
وطبعاأي وحدة من عزيزاتي اللطيفات الأنيقات بتضيف شي مفيد من مجال الاتكيت وحسن التصرف ..
ماتبخل به علينا لأن الكل محتاج يتعلم فن التعامل مع الكل وبكل شي وبس..سلامتكم وتعيشوووون
اتمنى من الكل يستفيد ويفيد غيره
أكيد مووب ناقصكم شي..بس مايمنع التذكير..وما ازكي نفسي
تقبلو تحياتي ومودتي
عوومري
[b]
الأحد سبتمبر 27, 2009 3:52 am
